Tadej Pogacarrek (UAE) ezin hobeto ekin dio Espainiako Vuelta irabazi eta hiru itzuli handiak eskuratu dituen bederatzigarren txirrindularia izateko erronkari. Txirrindulari esloveniarrak lehen etapa irabazi du gaur, bederatzi kilometroko banakako erlojupekoa, Monakon. Garaipen horri esker, liderraren maillot gorria jantzi du.
Pogacar gutxigatik nagusitu da, bederatzi ehunenengatik hartu baitio aurrea Ethan Hayterri (Soudal). Joshua Tarling (Ineos) sailkatu da hirugarren, lau segundora.
Nolanahi ere, esloveniarrak oso kontuan hartzeko aldeak atera dizkie aurkari nagusiei: 22 segundo Primoz Roglici (Red Bull), 28 Tobias Johannessini (Uno-X), 29 Mattias Skjelmoseri (Lidl), 33 Enric Masi (Movistar) eta Richard Carapazi (Education First), 45 Sepp Kussi (Visma) eta 46 Felix Galli (Decathlon), besteak beste.
Xabier Mikel Azparren (Q36.5) aritu da ondoen euskal ziklisten artean, 29 segundora.
