Realaren Superligako taldeak bere historia laburreko lehen titulua irabaz dezake asteburu honetan, Las Rozasen (Espainia). Talde txuri-urdina Espainiako Kopako Lauko Finalean ariko da, Bartzelona, Espanyol eta Atletico Madrilekin batera. Jose Manuel Etxabek zuzentzen duen taldeak Bartzelona gainditu behar du gaur lehen finalerdian txapelarekin amets egiten jarraitzeko (18:00, Teledeporte). Sailkatuz gero, Espanyol edo Atletico Madrilen aurka jokatuko luke etzi finalean (12:00, Teledeporte). Bigarren finalista erabakitzeko partida ere gaur jokatuko da (20:30, Teledeporte).
Faboritorik gabeko finalerdia da Realaren eta Bartzelonaren artekoa. Denboraldi honetan bi taldeek elkarren aurka jokatutako partidetan gertatutakoari erreparatu besterik ez dago: bana berdindu zuten Katalunian, eta hutsean Euskal Herrian. Beraz, parekotasuna da nagusi.
Txuri-urdinek Valentzia eta Sant Gabriel kanporatu dituzte Lauko Finalera iristeko, eta Bartzelonak Reocin eta Rayo Vallecano. Madrilgo taldea, Superligako txapelduna, bidean utzi izanak konfiantza handia eman die kataluniarrei. Realeko jokalariei ere ez zaie gogo eta ilusiorik falta. «Saria da jada hemen egotea. Baina behin egonda, dugun guztia eman nahi dugu. Aukera bikaina dugu historia egiteko», esan du talde txuri-urdineko entrenatzaileak.
Realak Bartzelonaren aurka jokatuko du gaur, Kopako finalerdietan
Txuri-urdinek berdindu egin dute denboraldi honetan kataluniarren aurka jokatutako bi partidetan
Iruzkinak
Ez dago iruzkinik
Ordenatu