San Miguel ligak atseden hartu arren asteburuan, lau estropada daude gaur

Arraunak ez du atsedenik har- tzen, eta gaur, lau estropada izango dira jokoan. KAE 1 ligan, Orion ariko dira arraunean, zazpigarren jardunaldian (18:15). Orain arteko denak irabazita ditu Oriok, eta hura da faboritoa gaur ere.

Leku berean, ordu laurden lehenago, Gipuzkoako ligako bosgarren estropada izango da. Sailkapenean, Zumaia da buruan, eta bi puntura dauka Getaria Tolosa. Gaurkoarekin, hiru estropada baino ez dira falta lehiaketa hori amaitzeko.

KAE 2 ligan, zortzigarren jardunaldia daukate Plentzian (16:30). Trintxerpe doa buruan, eta Orio b hiru puntura dauka. Gaur ere, bien arteko lehia izango da, aurreko guztietan bezala.

Azkenik, Castron, Espainiako txapelketako lehen jardunaldia izango da jokoan (18:00). Zortzi traineru ariko dira: Kaiku, Urdaibai, Hondarribia, Astillero, Castro, Pedreña, Tiran eta Amegrove. Txanden zozketa 16:00etan da. Txandako garaileak igandeko finalera sailkatuko dira, eta haien atzetik bi denbora onenak egiten dituztenak ere bai. Laukote horrek izango du bandera irabazteko aukera bihar eguerdian.