Tobe Alexanderson norvegiarrak (4:08:09) eta Elhousine Elazzaoui marokoarrak (3:45:07) irabazi dute 25. Zegama-Aizkorri mendi maratoia. Biek egin dute historia. Alexandersonek zortzi minutuan ondu du 2017an Nienke Brinkman herbereetarrak jarritako errekorra, eta Elazzaoui bigarren aldiz jarraian nagusitu da. Orain artean Kilian Jornetek soilik zuen hori lortua.
Emakumezkoen podiuma Malen Osa oñatiarrak (4:23:56) eta Sara Alonso donostiarrak (4:25:51) osatu dute. Ederra eta estua izan da bi euskal korrikalarien arteko lehia. Lasterketaren lehen erdian Alonso joan da aurretik, baina Aizkorriko gailurrerian Osak aurreratu egin du eta helmugara arte eutsi dio bigarren postuari. Oñatiarrak, gainera, iaz Alonsok jarritako denbora hobetu du –4:27:25 egin zuen iaz–, eta harena izango da aurrerantzean euskal emakumezkoen artean erreferentziazko denbora. Laugarren Ida Amelie Robsahm norvegiarra izan da (4:28:19) eta bosgarren Maria Fuentes alacantdarra (4:33:10).
Mutiletan Daniel Patis italiarra sailkatu da bigarren (3:45:27), irabazlearengandik 20 segundora. Ia ibilbidea osoa elkarrekin egin dute, eta bazirudien esprintean jokatuko zela bukaera, baina marokoarrak erakustaldia egin du beheranzko azken kilometroetan eta bakarrik helmugaratu da. Hirugarren Taylor Stack estatubatuarra (3:52:17) helmugaratu da, azken kilometrotan Manuel Merillas espainiarrari (3:53:14) aurre hartuta. Bosgarren Robert Pkemoi keniarra sartu da (3:53:28).
Kilian Jornet ez da espero bezala lehiatu, gorantz ondo sentitu dela baina zelaian eta beherantz minekin ibili dela jakinarazi du Zegaman 11 aldiz irabazitakoak. Beraz, Aizkorriko gailurreriatik aurrera «lasaiago hartzea, zaleak agurtzea eta lasterketaz beste era batera gozatzea» erabaki du. Zegamako helmugan 43. izan da (4:19:23), zaleen txalo zaparraden artean.
Gizonezkoetan lehen euskal herritarra Aitor Ajuria (Leintz-Gatzaga, 1998) izan da. Lasterketa ikaragarria egin du Ajuriak, eta lau ordutik jaistea lortu du (3.57.56).
Sailkapen guztiak esteka honetan.
Sailkapenak
Neskak
- 1. Tobe Alexanderson. 4:08:09
- 2. Malen Osa. 4:23:56
- 3. Sara Alonso. 4:25:51
- 4. Ida Amelie Robsahm. 4:28:19
- 5. Maria Fuentes. 4:33:10
Mutilak
- 1. Elhousine Elazzaoui. 3:45:07
- 2. Daniel Patis. 3:45:27
- 3. Taylor Stack. 3:52:17
- 4. Manuel Merillas. 3:53:14
- 5. Robert Pkemoi. 3:53:28
