Ekaitzak ere ez du zapuztu Baionaren besta. Sasoi honetan ez du partidarik galdu Jean Daugerren, eta final-laurdenean ere ez du huts egin: 20-3 zanpatu du Clermont, argiki, eta, hortaz, lapurtarrek Top14 ligako finalerdia jokatuko dute. Azkenekoz, 1992an jokatu zuten titulurako final-laurden bat, eta, orduan ez bezala, oraingoan kanporaketa gainditzea lortu dute. 2009an Top14 formatua sortu zenetik, lehenbiziko aldia izanen dute finalerdietan.
Jendetza elkartu da partida ikusteko Jean Dauger estadioan ez ezik, baita hirian ere. Baionarrek azken bi ligetako txapelduna dute esperoan finalerdia jokatzeko: Tolosa. Okzitanian ariko dira, hilaren 20an.
