Bartzelona Europako talderik onena da berriro ere. Aurreko denboraldian galdu egin zuen Arsenalen aurka, baina berriro ere gorenean dira kataluniarrak. Laugarrenez irabazi dute Txapeldunen Liga, Lyoni 4-0 irabazita. Lehen zatia nola joan den ikusita, inor gutxik pentsa zezakeen neurketa horrela amaituko zenik. Izan ere, lehen zatian Lyon nagusi izan da, presioan asmatu du, eta Bartzelona deseroso aritzea lortu du. Kataluniarrek sufritzen jakin dute, eta bigarrenean nagusi izan dira baloiarekin. Jokaldiak gehiago landu dituzte, eta lau golekin biribildu dute lan ona. Pajorrek sartu ditu bi, eta Salmak beste bi.
Bartzelonaren hasierako hamaikakoan, berritasuna Paralluelo izan da. Pere Romeuk haren abiadura baliatu nahi izan du, eta Pina aulkian utzi du. Lyonen, Dianeren partez —min hartuta dago— Bechok jokatu du. Bi euskal jokalari aritu dira finalean: Irene Paredes Bartzelonarekin, eta Damaris Egurrola Lyonekin. Paredesek hasieratik jokatu du; Damarisek, berriz, ez du jokatu.
Bizi hasi da partida. Ez talde batek ez besteak ez dute lortu baloiaren jabe izatea. Bizkor jokatzeak Lyoni egiten zion mesede. Bartzelonari, berriz, jokoa gehiago lantzea komeni zitzaion. Pixkanaka lortu du, eta halako jokaldi batean iritsi da gola sartzeko izan duen lehen abagunea. Graham Hansenek buruz buruko jokaldi bikaina egin du eskuinetik, atzean utzi du Basa, eta haren erdiraketa gutxigatik errematatu du kanpora Alexia Putellasek. Ondoren iritsi da Lyonen erantzuna, falta batean. Renardek egin du errematea, buruz, eta Cata Collek gelditu bikaina egin dio. Baina Bartzelonako atzelariak ez dira adi egon, eta Heapsek aldaratzea baliatu du gola sartzeko. VAR-ean begiratu ostean, ordea, ez du ontzat eman, aurrelaria jokoz kanpo zegoelako.
Lyonek arriskatu egin du, eta buruz buru lehiatu da. Frantziarrek dezente aurreratu dute atzeko lerroa. Bartzelona saiatu da Lyonen erdiko atzelarien bizkarrean zuloak topatzen. Baina ez du lortu, eta deseroso aritu da. Izan ere, luze jokatu behar izan du. Horrek gauzak erraztu dizkio Lyoni, bizkorrago berreskuratu baitu baloia, eta bizi atera da erasora. Hala, 24. minutuan bi aukera argi izan ditu aurretik jartzeko. Lehenengoan, Bartzelonako atzelariek azken unean kendu diote baloia Hegerbergi. Bigarrenean, Brandek kanpora bidali du baloia. Minutu horietan, Jonathan Giraldezek zuzentzen duen taldea hobeto aritu da.
Azken minutuetan, norgehiagoka zerbait aldatu da. Kataluniarrek argitasun handiagoaz mugitu dute baloia, eta pare bat aldiz lortu dute Endleren atera iristea. Abagune argiena Graham Hansenek izan du berriro ere. Area ertzeko eskuinaldetik egin du errematea, baina Lyonen atzelari baten kontra jo du, eta baloia kornerrera joan da. Horren ostean amaitu da lehen zatia.
Pajorren gola
Bigarrenean, Bartzelona hobeto zelairatu da. Baloiarekin argitasun handiagoa izan du, eta errazago mugitu du batetik bestera. Lyonek presioari eutsi dio, baloia bizkor berreskuratu eta bizi erasora jotzeko. Baina Pere Romeuren taldea jarri da aurretik. Patri Gijarrok baloia berreskuratu du zelai erdian, indartsu eta bizi egin du aurrera, eta pase ona eman dio Pajorri. Hark baloia jaso du, eta ederki gurutzatu dio Endlerri, 55. minutuan. Norvegiarrak hamargarren gola sartu du txapelketan, eta arantza atera ahal izan du. Izan ere, Txapeldunen Ligako bost final zituen jokatuak, eta garaikurra irabazi gabe zegoen. Gaurkoan ederki atera du arantza; etxean, gainera, Oslon jokatu baitute finala.
Lyonek aurrera egin du hurrengo minutuetan, eta Bechok gertu izan du gola 61. minutuan. Ezkerrez erremate ona egin du arearen ertzetik, baina Cata Collek bikain atera du eskua, eta kornerrera bidali du baloia. Orduan esku hartu dute entrenatzaileek. Lyonen Katoto eta Chawinga zelairatu dira. Horrekin, frantziarren entrenatzaileak, Giraldezek, indarra eta abiadura eman nahi izan dio aurrealdeari. Romeuk, berriz, Pina atera du, zelai erdiaren eta aurrealdearen artean min egiteko. Bete-betean asmatu du. Bartzelonak are gehiago estutu du, eta Lyoni ez dio aurrera egiten utzi. Gainera, erasoan ondo mugitu du baloia. 70. minutuan sartu du Bartzelonak bigarren gola. Pajorrek hasi eta bukatu du jokaldia. Norvegiako aurrelaria bizi atera da gora, eta Pinari eman dio. Hark hegalera eman dio Brugtsi. Hegalekoak bigarren zutoinera erdiratu du, luze. Baina Paralluelo iritsi da; ondo ikusi du Pajor, eta, atzetik etorrita, ez du barkatu.
Bartzelonak gertu zuen garaikurra. Izan ere, frantziarrek estutu dutenean, Cata Coll atezaina azaldu da. 75. minutuan egin du neurketako gelditurik onena. Chawinga aurrez aurre geratu da, baina eragotzi egin dio errematea egitea. Kataluniarrek kontrolpean izan dute partida, eta azken minutuetan beste bi gol sartu dituzte. Biak Salmak. Lehena 90. minutuan sartu du, ezkerrez erremate ikusgarri bat eginda; bestea 93.ean sartu du, Pajorren pase bat jaso eta Lyonen aurrelariei aurrea hartuta.
