Athleticek prest du guztia Txapeldunen Ligako ametsari ekiteko. Egutegian gorriz markatua zuen gaurko zozketa, eta jada ezagun ditu zortzi aurkariak. Nico Williamsek zera esan zuen joan den igandean: jokalari guztiak telebistari so egongo zirela zozketak zer emango. Bada, UEFAk Monakon egin duen zozketan aurkari handiak eta gogorrak egokitu zaizkio gehienbat Athletici. Jakina da Txapeldunen Ligan ez dagoela lan errazik, baina, besteak beste, iragan sasoiko txapeldunari aurre egin beharko dio Ernesto Valverderen taldeak San Mamesen: PSGri. Bilbo bisitatuko duten gainerako hiru aurkariak Arsenal, Sporting Portugal eta Karabakh izango dira. Hegazkinera, berriz, Borussia Dortmunden, Atalantaren, Slavia Pragaren eta Newcastleren zelaietan jokatzeko igo beharko dute zuri-gorriek. Behin betiko egutegia etzi jakinaraziko du UEFAk.
Erreakzio sorta berehalakoa izan da Athleticen, eta jokalarien artean Dani Vivianek hitz egin du. Beldurrik gabe, abentura ilusioz abiatuko dutela aitortu du. «Zozketak izen handiak jarri dizkigu parean, baina ilusio izugarria daukagu. Txapeldunen Ligako ereserkia San Mamesen entzutea izugarria izango da. Ez dugu beldurrik, gai baikara edonori irabazteko». Helbururik ez du aipatu nahi izan arabarrak. «Beti bezala, gure jokoa egin eta partida bakoitza irabaztea izango da xedea. Ea noraino iristeko gai garen».
Gogortasuna ez ezik, ilusioa ere eman dio zozketak Athletici. Izan ere, San Mamesen PSG eta Arsenal hartzea luxua izango da jarraitzaileentzat. PSGk aho zabalik utzi zituen futbol zaleak joan den sasoian. Luis Enrique da taldeko gidaria, eta noizbait aitortu izan du egunen batean gustatuko litzaiokeela Athletic zuzentzea. Beraz, morboa izango du Bilbora egingo duen bisitak. PSG bezala, Arsenal ere faboritoen zerrendan ageri da. Athleticek denboraldiaurrean neurtu zituen indarrak Mikel Artetaren taldearen aurka, eta 3-0 galdu zuen. Arsenalekin hiru euskal futbolarik bisitatuko dute San Mames: Mikel Merinok, Martin Zubimendik eta Kepa Arrizabalagak. Azken horrek lehen bisita izango du San Mamesera taldea utzi zuenetik.
Bilbon jokatuko duten beste bi aurkariak Sporting Portugal eta Karabakh izango dira. Printzipioz, multzoko aurkari erosoenak dirudite. Sporting Portugal ezagun zaharra izango da San Mamesen. Izan ere, Athleticek 2012an Portugalgo taldearen aurka lortu zuen UEFAko finalerako sailkatzea, luzapenean Fernando Llorentek sartutako gol bati esker.
Bidaia erosoak
San Mamesetik urrun, zelai historikoak bisitatuko dituzte zuri-gorriek. Borussia Dortmunden zelaia Europako garrantzitsuenetako bat da, eta han jokatzea luxua izango da jokalarientzat. Gauza bera esan daiteke Atalantaren inguruan. Azken urteetan ohiko talde bilakatu dira italiarrak Txapeldunen Ligan, eta urrun iristeko gaitasuna dute. Slavia Pragari egin beharko dion bisita ere polita izango da Valverderen taldearentzat. Urrutira joan gabe, iragan sasoian Europa ligan neurtu zituen indarrak Athleticek Slavia Pragaren aurka, San Mamesen, eta zuri-gorriak nagusitu ziren (1-0). Dena den, bisitarik bereziena Newcastleri egin beharrekoa izango da. Bi taldeek batasun berezia dute aspalditik, eta Athleticeko jarraitzaile askok joan nahiko dute hara. Inork buruan badu bidaiatzea, lau bidaiak izango dira erosoak.
Txapeldunen Ligako multzoen faseko lehen jardunaldia irailaren 16 eta 18 bitartean jokatuko da, eta zortzigarrena, urtarrilaren 28an, egun eta ordutegi bateratuan. Jardunaldi bakoitza noiz eta non jokatu beharko duten etzi jakinaraziko die UEFAk klub guztiei. Iazko formatuari eutsiko dio lehiaketak. Lehen zortzi sailkatuak final-zortzirenetan izango dira, eta bederatzigarren eta 24. postuen artean geratzen direnek final-hamaseirenak jokatuko dituzte. Hortik atzerakoek agur esango diote txapelketari. Final-hamaseirenak otsailean izango dira, zortzirenak martxoan, laurdenak apirilean, finalerdien joanekoa apirilaren 28-29an, eta itzulerakoa maiatzaren 5-6an. Final handia maiatzaren 30ean izango da, Budapesten (Hungaria).
Partidak
Etxean: Paris Saint Germain, Arsenal, Sporting Portugal eta Karabakh.
Kanpoan: Borussia Dortmund, Atalanta, Slavia Praga eta Newcastle.
