Urdaibaik azken kolpea izan daitekeena eman dio ligari Zarautzen

Galizian sufritu ostean, mamu guztiak uxatu ditu Bou Bizkaiak asteburu honetan Zarautzen (Gipuzkoa). Larunbatean, ia erabakita utzi zuen bandera lortzeko lehia, eta, igandean ere, bermeotarrak izan ziren azkarrenak. Sasoi guztian bezala, bigarren luzean puskatu zituzten estropadak, eta jada ohikoa da Urdaibai ohorezko txandan nagusi izatea. Hamabost estropadetatik bederatzi irabazi dituzte bizkaitarrek. Hortaz, ia erabakita dago liga. Urdaibaik bederatzi punturen aldea du Zierbenarekin eta Hondarribiarekin. Bestalde, Santurtzik ere ia erabakita utzi du Meirarekin daukan lehia, eta ezusterik ezean, galiziarrek galduko dute maila zuzenean.