Xabier Isasak (Euskaltel-Euskadi) era ederrean lortu du profesionaletako lehen garaipena. Urretxuko (Gipuzkoa) txirrindularia gailendu da Portugalgo Itzuliko gaurko saioan; seigarren etapa izan da, Santa Maria da Feira eta Peso da Regua artekoa. Isasa bikain aritu da etapa osoan: lehenbizi, eguneko ihesaldian sartu da; gero, Rui Oliveirarekin batera egin du aurrera; eta, azkenik, txirrindulari portugaldarrari irabazi dio esprintean.
Pozarren zegoen Isasa etapa bukatu berritan. «Oso etapa gogorra izan da. Lehenbizi, txirrindulari askok osatutako ihesaldian sartu naiz; gero, faboritoek erasoa jo dute, eta harrapatu egin gaituzte. Baina hankak indartsu nituenez berriro erasoa jo, eta esprintean irabazi dut. Anaiak beti esaten dit burua hotz izan beharra dagoela, behar baino gehiagotan ematen baitut aurpegia. Gaur haren hitzekin gogoratu naiz, eta garaipena lortu dut».
Isasak 24 urte ditu, eta bosgarren denboraldia du profesionaletan, guztiak ere Euskaltel-Euskadirekin eginak. Hain zuzen, Isasak eman dio euskal talde horri denboraldi honetako hirugarren garaipena. Axel van der Tuukek eta Paul Hennequinek lortu zituzten beste biak.
