Arraun Lagunak-ek salbu, tentsio handiko eguna izan dute gaur Kontxarako sailkatze estropadan lehiatu diren hemeretzi traineruek. Batzuentzat egin beharreko tramite bat izan da, baina besteentzat, berriz, presio handiko jarduna. Patuak gauza politak ekartzen dituela esaten da, eta hori gertatu zaio gaur Zarautzi. Zazpigarren sailkatu da Enbata ontzia, eta, joan den urtean ez bezala, Donostian izango da datozen bi igandeetan. Joan den urtean sailkatzea lortu zuen, baina patroiak estatxa behar baino lehenago askatu zuenez, epaileek hamar segundoko zigorra ezarri zioten, eta aurpegi ilunak ikusi ziren arraunlarien eta zaleen artean.
Aurten, baina, poza eta zoramena izan dira nagusi, eta Zarautz Kontxan ariko da, han azkenekoz aritu zenetik hamar urte beranduago. 2016an lehiatu zen Kontxan azkenekoz, eta orduko hartan Getariarekin batera osatu zuen trainerua. Oso pozik zegoen Nahikari Osa Zarauzko patroia estropada amaitu berritan: «Sekulako motibazioa eman digu honek. Ez gara zortzigarren postuarekin konformatuko, eta gehiagoren bila joango gara».
Zarautzekin batera beste sei ontzi hauek sailkatu dira: San Juan izan da onena, Astillero bigarren, Tolosaldea hirugarren, Orio laugarren, Hibaika bosgarren eta Donostiarra seigarren. Gaurko lehen zazpi sailkatuak eta Arraun Lagunak ariko dira Kontxan, datozen bi igandeetan.
Eguneko albiste iluna, ordea, Hondarribiarentzat izan da. ETE ligako txapeldun izan da, Zarautzen aurretik, baina zortzigarren postuarekin konformatu behar izan du gaur. Lehia estua izan da hasieratik, eta aipagarriak izan dira Kaikuk eta Tiranek egin dituzten estropadak. Bi ontziak bikain aritu dira ziabogan, eta, azkenera arte saiatu diren arren, ez dute helmugan Zarautzen denbora hobetu.
«Sekulako motibazioa eman digu honek. Ez gara zortzigarren postuarekin konformatuko, eta gehiagoren bila joango gara»
NAHIKARI OSA Zarauzko patroia
Barrurako itzulian Hibaikak egin du denborarik onena. Madalen ontziak denboraldi bikaina osatu du, eta beste behin lortu du Kontxako Banderarako sailkatzea. Inge Ugarte patroiak nola aritu diren azpimarratu du: «Presio apur bat genuen, baina arraunlariek sekulako estropada osatu dute, eta harro nago egin duten lanaz».
San Juanek egin du arratsaldeko denborarik onena. Batelerak ontzia hirugarren izan da Euskotren ligan, eta gaur sailkatzea zuen helburu. Harrobiko arraunlariz osatutako taldea da Pasai Donibanekoa (Gipuzkoa), eta hainbat arraunlari gazte hunkituta agertu dira estropadaren ostean. Basagaitz Gereño San Juaneko arraunlariak taldearen izaera nabarmendu du: «Harrobiko taldea gara, eta horrelako maila eman izana sekulakoa da».
Sekulakoa izan da Tolosaldeak, Oriok eta Astillerok izan duten lehia. Kantabriako (Espainia) ontziak maila bikaina eman du Euskotren ligan bosgarren postua eskuratuta. Gaur ere fin ibili da, eta hiru ontzien artean hamalau ehunenen aldea baino ez da izan. Nerea Perez Tolosaldeko patroia iganderako gogoz agertu da: «Batzuetan fin ibili ez bagara ere, uste dut gure mailan gaudela berriro. Horregatik, igandean dena ematera eta lehiatzera etorriko gara».
«Presio apur bat genuen, baina arraunlariek sekulako estropada osatu dute, eta harro nago egin duten lanaz»
INGE UGARTE Hibaikako patroia
Donostiarra iazko egoera berean heldu da Kontxarako sailkatze estropadara. Iaz lehen aldiz jokatu behar izan zuen sailkatze estropada, baina, orduko hartan bezala, sekulako estropada osatu du. Irati Etxebeste Donostiarrak taldeko arraunlariak lehia parekatua izan dela nabarmendu du: «Lehia berdindua izan da. Gure helburua ahalik eta postu onena lortu eta lehen txandan sartzea izango da».
Txandak, erabakita
Estropada amaitu eta gero, ordezkarien bilera egin dute, eta, horrekin batera, baita txanden zozketa ere. Beraz, Kontxako Bandera jokatuko duten zortzi taldeek badakite dagoeneko zein txandatan eta norekin lehiatuko diren. Lehen txandan Tolosaldea, Hibaika, Donostiarra eta Zarautz ariko dira. Bigarren txanda, berriz, Astillerok, Arraun Lagunak-ek, San Juanek eta Oriok osatuko dute.
Igandean izango da Kontxako Banderako lehen jardunaldia (11:00, ETB1). Talde bakoitzak bere helburua izango du, eta lehia sutsua espero da.
