Realak jokatuko duen Espainiako Kopako finalerako, zaleentzako guneak atonduko ditu Gipuzkoako Foru Aldundiak hainbat herritan: pantaila handiak jarriko ditu Zarautzen, Zumarragan, Tolosan eta Lasarte-Orian. Horrez gain, Donostiako Udalak ere pantaila handia jarriko du Alderdi Ederren, baita Zumaiako Udalak ere Odietako frontoian.
Gipuzkoako Foru Aldundiak hiriburutik at ere festa guneak prestatu nahi ditu, eta, horrela, «elkartzeko eta ospatzeko» espazioak sortu. Pantailez gain, musika, puzgarriak eta beste ere egongo dira. Herri horietara joateko autobus zerbitzua indartuko dute.
Goizane Alvarez Kultura, Lankidetza, Gazteria eta Kirol diputatuak nabarmendu duenez, helburua «finaleko emozioa» lurraldeko hainbat udalerritara eramatea da: «Gipuzkoa osoak finala kolektiboki sentitzeko, ospatzeko eta bizitzeko aukera izatea nahi dugu».
