Carlota Zigandak oso ondo hasi ditu Olinpiar Jokoak. Golf jokalari nafarrak 68 kolpe behar izan ditu gaur Kasumigasekiko golf zelaiko ibilbidea osatzeko, parraren azpitik hiru. Laugarren tokian dago sailkapenean, Madeleine Sagstromengandik (Suedia) bi kolpera.
Indartsu hasi da Ziganda. Lehen zuloan birdie bat lortu du, baina 3. eta 4.ean bogey-ak egin ditu. Baina norabidea zuzendu du, eta 8., 9., 11., eta 12. zuloetan birdie-ak egin ditu, eta jokoa sendotu. 18. zuloan parra batekin bukatu du.
Larunbatera bitartean jokatuko da lehiaketa, stroke play eran. Ez dute galbaherik izango lehiaketaren erdian, eta, hortaz, lau egunen ondoren kolpe gutxien behar izan dituenak irabaziko du urrea. 60 golfari ari dira parte hartzen. Ziganda bigarrenez ari da Olinpiar Jokoetan; 2016ko Rioko Olinpiar Jokoetan 38. sailkatu zen.
