Hautsak harrotzen ari da berriro Elizabeth Holmesen izena. Nathan Fielder eta Lance Oppenheim zuzendarien Everyone You Can See dokumentala urriaren 16an estreinatu zuten Ameriketako Estatu Batuetan, eta dagoeneko ikusleek Oscar sarietarako hautagai posibleen artean kokatu dute. Baina nor da Elizabeth Holmes? Haren istorioa kontatzen duen telesail bat dakarkizuet gaur, Disney Plus plataformako The Dropout.
Holmesek 19 urte zituen Stanfordeko Unibertsitatea utzi eta Theranos sortu zuenean. Medikuntza irauli —edo, besterik gabe, aberastu— nahi zuen, odol tanta bakar batekin ehunka analisi egiteko modua ematen zuen teknologia bat zuela esanez. Inbertsoreak liluratu zituen, Steve Jobs berritzat aurkeztu zuten, eta enpresak milaka milioi dolarreko balioa lortu zuen. Arazoa? Teknologiak ez zuen funtzionatzen.
Elizabeth Meriwetherrek sortutako zortzi ataleko telesailak iruzurraren gorakada eta gainbehera kontatzen ditu. Baina The Dropout ez da iruzurgile baten istorio hutsa, anbizioaren eta boterearen inguruko kontakizun zorrotza da, Silicon Valleyren kontraesanak agerian uzten dituena. Nola sinetsi zuten hainbeste inbertsorek gezur bera?
Amanda Seyfrieden interpretazioa bikaina da. Holmesen eraldaketa erakusten du, gazte idealista izatetik bere gezurraren preso bihurtutako enpresaburu manipulatzaile izateraino. Ahots sakonak eta begirada hotzak pertsonaia deseroso bezain liluragarria osatzen dute. Batzuetan, barregarria da; besteetan, beldurgarria.
Istorioaren larritasuna gorabehera, umoreak ere badu lekua. Egoera absurdoek komediaren eta dramaren arteko oreka sortzen dute. Janzkera, ahotsa eta jarrera; dena da arrakastaren antzerkiaren parte. Teknologia baino gehiago, Holmesek bere burua saltzen zuen.
Iruzurra ez zen Holmesen anbizioaren ondorio hutsa. Kapitalismoaren gurpil zoro horretan, inbertsoreek sinetsi nahi zuten, komunikabideek jenio bat aurkitu nahi zuten, eta enpresek ez zuten iraultzatik kanpo geratu nahi. Bitartean, pazienteen segurtasuna arriskuan zegoen.
The Dropout aurten ikusi dudan telesailik onenetakoa da. Amaiera ezaguna izan arren, harrapatu egiten zaitu. 2022an estreinatu bazen ere, gaurkotasun handikoa da adimen artifizialaren inguruko euforia honetan. Izan ere, promes handi guztien atzean ez dago beti benetako iraultzarik.
