Paella bat prestatzeko, haragia oliotan erregosten has zaitezke, ondoren barazkiak eta arroza gehitu ditzakezu. Azkenik, urez estali dezakezu dena, eta irakiten jarri. Beste aukera bat izan daiteke hasieran ura irakiten jartzea, eta ondoren, arroza, barazkiak, haragia eta olioa gehitzea. Osagaiak berberak dira, baina pausoen sekuentziak emaitza baldintzatuko du.
Orain, pentsatu ikastaro bat jasotzen ari zarela. Irakasleak esan dizu arazo bat ebatziko duten ideia berritzaileak idatzi behar dituzula. Ideien ekoizpen-prozesu horretan, irakasleak eskatuta, txatbota erabili behar duzu derrigorrez. Zein izango litzateke zure lehenengo pausoa?
Bada, Singapur eta Tokioko unibertsitateetako bost irakaslek eszenatoki horren inguruan ikerketa egin eta emaitzak maiatzean argitaratu zituzten. Hau zen galdera: baldintzatzen al du adimen artifizial sortzailea ideia-sorkuntzarako erabiltzen dugun momentuak? Hau da, berdina al da txatbota sorkuntza prozesuaren hasieran edo amaieran erabiltzea?
Hori aztertzeko, 60 pertsonarekin esperimentu bat egin zuten. Esperimentuko parte hartzaileek osasun gaiei buruzko ideia berriak sortu behar izan zituzten adimen artifizialaren laguntzarekin. Bi talde osatu zituzten. A taldeak txatbota hasieratik erabili zuen, eta ondoren garatu zituzten ideiak. B taldean, aldiz, hasieran ideiak bakoitzak bere kabuz landu eta zirriborratu zituen, eta ondoren, txatbota erabili zuten haien ideiekin jolasteko.
Hona emaitzak: hasieratik adimen artifizialarekin lan egin zutenek, A taldekoek, originaltasun gutxiagoko testuak ekoitzi zituzten; izan ere, kognitiboki finkatuta geratu ziren, ez ziren gai izan AAk proposatutako bideetatik ateratzeko. Bestalde, offline lan egiten hasi zirenen kasuan, ondoren txatbota sartzeak ideia gehiago sortzera eraman zuen B taldea. Independenteki lan egiten hasi zirenek autonomia maila handiagoa zuten, baita azken produktuaren jabetzaren sentimendu indartsuagoa ere. Bestetik, AA hasieratik erabiltzeak norberaren sorkuntza gaitasunean konfiantza zapuztu zuen; erabiltzaileak alfer sentitu ziren pentsatzeko orduan.
Ikertzaileen ondorioa: AA sortzailea, erabiltzekotan, inkubazio fase baten ostean txertatu behar da. Hasi norbere burua zukutzen, eta gero gerokoak.
