Hegoi Belategi esatariak gidatuta, Naiz irratiak arrantzari buruzko saio bat abiarazi du. Sarea galdu aurretik du izena programak, eta igandero emitituko dute irratian, 09:00etako albistegia amaitu bezain laster. Podcast modura ere entzun ahalko da, Naiz irratiaren webgunean.
Saio berriak hainbat atal izango ditu. «Urratsez urrats, arrantzaleak eta haien bizimodua ezagutaraztea izango da helburua, eta azkeneko urteetako gainbeheraren arrazoiak eta gaur egun dituzten erronka nagusiak aztertzea», azaldu du Belategik. Igandean eman zuten aurreneko atala. Igotz Garatea Lekeitioko (Bizkaia) Kalamua II baporeko patroia eta Aritz Martinez Hendaiako (Lapurdi) Atalaia Berria ontziko arrantzalea izan ziren protagonistak.
Euskal Herriko arrantzaleek baliatzen dituzten arrantza ereduen inguruko azalpenak ere eramango dituzte programara, hau da, hizpide izango dituzte Bizkaiko golkoko zenbait arrantza mota, hala nola baxurakoa. «Dena den, alturako arrantzaleen eta ordezkarien azalpenak ere agertuko dira saioan, sektorearen aniztasuna eta konplexutasuna ulertzeko asmoz».
Naiz irratiaren arabera, «gain behera joan arren, arrantza sektoreak bizirik dirau Euskal Herrian, eta uste baino konplexuagoa da». Beraz, entzuleei egoera hori helarazten saiatuko dira astez aste.
