Aste batzuetako atsedenaldiaren ostean, bueltan da Egunean Behin jokoa. Datorren astelehenean, maiatzaren 5ean, hasiko da hemezortzigarren denboraldia, eta uztailaren 13ra arte iraungo du. Bestalde, jokoaren sustatzaileek iragarri dute Egunean Behin-ek jarraipena izango duela 2025. urtea amaitu arte behintzat.
Martxoan sei urte bete zituen Egunean Behin-ek, eta batez beste 60.000 erabiltzaile inguru ditu egunero. Aurreko denboraldian, babesa eman zuten eragileei 20.000 klik baino gehiago iritsi zitzaizkien Egunean Behin-en aplikaziotik.
Hemezortzigarren denboraldiko babesle nagusia Gipuzkoako Foru Aldundia izango da, Ipuskoa 1025 - 2025 kanpaina sustatzeko, mila urte baitira lurraldearen lehen aipu historikoa agertu zela.
Eibarko (Gipuzkoa) Codesyntax enpresak egiten du Egunean Behin. Hain zuzen ere, 25 urte bete ditu Codesyntax-ek. Eta duela egun batzuk enpresaren inguruko erreportaje bat argitaratu zuen BERRIAk. Gaur egun, 25 langile dira enpresan, bete dituzten urteak bezainbeste.
