Espainiako Kopako bi finalerdietako bat jokatuko dute Athleticek eta Realak, eta euskaraz eta doan ikusteko aukera izango da. Asteazkenean, Bilboko San Mames zelaian, aurrez aurre izango dira Athletic eta Reala. ETB1 kateak eta ETB On Interneteko plataformak zuzenean emango dute lehia, 21:00etan.
EITBk RTVErekin duen lankidetza ildoaren barruan, euskal taldeen finalerdiak eta Sevillako (Espainia) finala euskaraz emango ditu EITBk.
Asteazkenean, 20:40an hasiko du ETBk Koparen bila saio berezia. Amane Ibañez kazetariak gidatuko du emankizuna, eta alboan izango du Jon Balentziaga, estadioan, baita Naxari Altuna, Juanan Larrañaga eta Gorka Iraizoz ere, kontakizuna egiten. Eriz Hernandez eta Asier Aranguren ariko dira elkarrizketak egiten. Partida amaitu bezain laster, analisiak egingo dituzte.
ETB2 katean ere programazio berezia prestatu dute asteazkenerako: 17:30ean hasi eta partida iritsi arte, hiru ordu eta erdiko Euskadi Quédate berezia aurkeztuko du Odei Esnaolak Bilbon.
Euskadi Irratian eta Radio Euskadin ere egingo dute partiden zuzeneko emanaldia. Kirolakeitb.eus atari berrian ere ikusi ahalko da norgehiagoka.
Martxoaren 4an jokatuko dute bi euskal taldeek itzulerako partida, Donostian. Eta lehia hori ere zuzenean ikusi ahalko da ETBn zein TVEn.
Espainiako Kopako finala apirilean jokatuko da, Sevillan. Beste finalerdian Bartzelona eta Athletico Madril ariko dira aurrez aurre.
