Iritsi dira Eguberriak, eta euskarazko telebista kateek emankizun bereziak prestatu dituzte gaur gauerako. Hamaika telebistak Betiere, Kolpez Kolpe programa emango du gaur, 22:00etatik 23:30era. Naroa Iturrik gidatuko du saioa, eta alboan izango ditu Ekhiñe Atorrasagasti, Ibai Fresnedo, Jenni Lopez eta Nerea Arriola.
Gabon gaueko saio berezi horretarako abesti bat sortu dute lantaldekoek, Los Lobos taldearen La Bamba kantaren erritmora. Betiere, Kolpez kolpe izena du kantak, eta ikus-entzuleak animatu nahi dituzte asteazkenero Iturrik aurkezten duen programa ikustera.
Hamaikak iragarri duenez, Montekargasa ataleko esketxak ez dira faltako programan. «Ohiko umore azidoa» ere ez. Gainera, Mari Domingiren errepublikara bidaia egingo dute gaur gauean. Gauerdian berriro emango dute saioa, eta Internet bidez ere ikusteko aukera egongo da.
Kolpez kolpe-ko lantalde berak emango dio amaiera urteari Hamaika telebistan: Urtezaharreko saio berezia egingo dute, eta mahatsak Donostiako platoan jango dituzte. Gau horretan «martxa handiko» euskal musika izango dute. Kolpez Kolpe Onena eskainiko dute, hau da, urteko unerik onenen bilduma.
Urtarrilaren 6an, berriz, Gure Hots dokumentala estreinatuko du Hamaikak.
ETB1 Gure Zirkuko karpan
ETB1 katean, bestalde, Herri txiki, zirku handi programa emango dute gaur, 23:10ean. Mikel Pagadizabal eta Zuhaitz Gurrutxaga arituko dira aurkezle lanetan, Tolosan (Gipuzkoa), Gure Zirkuaren karpan.
Aurten Euskal Herrian gehien nabarmendu diren pertsonak kantuan jarriko dituzte: Euskal Pentatloi Sarietako parte hartzaileak; Euskadi Irratiko esatariak; euskal txirrindulariak; En Tol Sarmientoko Iñigo Etxezarreta, Zuhaitz Gurrutxagarekin batera; sei sukaldari eta aurkezlek Hilario Arbelaitz omenduko dute; lau pilotari kantuan arituko dira; Mihiluze-ko Ilaski Serrano eta Antton Telleria abesten nola moldatzen ikusi ahalko da; baita Conquis-eko —ETB2ko saioa urtarrilaren 9an itzuliko da— zenbait lehiakide ohi ere; eta Jai Alai Winter Series txapelketako finalistak ere abesten arituko dira.
Ohiko moduan, politikariak ez dira faltako Gabon gaueko saioan: Gasteizko, Donostiako eta Bilboko alkateek Hertzainak-en Aitormena kanta abestuko dute.
Orioko eta Urdaibaiko arraunlariak elkarrekin arituko dira kantuan. Eta Go!azen telesaileko sei aktorek Sugan taldearen Zarena zarelako abestia kantatuko dute.
Herri txiki, Zirku handi saioaren aurretik, ETB1ek Fair Saturday 2022 ikuskizunaren hasiera ekitaldia emango du, 22:05etik 23:10era. Bilboko Udal Musika Bandarekin batera, Bizkaiko 30 herritako abesbatza eta eragileetako lagunak aritu ziren kantari. Eta, haiekin batera, Gatibu, Maren, Afrika Bibang eta Kalakan taldeak. Aurretik ere, 21:00etan, Kalakan ikusi ahalko da ETBn.
Gabon gaua kantari pasatuko dute Hamaika telebistan eta ETB1en
Hamaikak 'Betiere, Kolpez kolpe' emango du gaur. ETB1ek, 'Herri txiki, zirku handi' saio berezia
![Umore onez eta kantuan arituko dira gaur gauean Hamaikaren Betiere, Kolpez kolpe saio berezian. HAMAIKA. Umore onez eta kantuan arituko dira gaur gauean Hamaikaren Betiere, Kolpez kolpe saio berezian. HAMAIKA.](https://www.berria.eus/uploads/s1/72/77/47/p025-f01.jpeg)
Iruzkinak
Ez dago iruzkinik
Ordenatu