'Go!azen'-en denboraldi berria ostiralean hasiko da

ETB1eko Go!azen telesailaren denboraldi berria etzi hasiko da, 21:00etan —larunbatetan ETB3n ere emango dute, 15:30ean—. Aurreneko aldiz, Ipar Euskal Herriko aktore bat arituko da: Joanes Etxebeste Sarako (Lapurdi) gazteak 18 urte ditu, eta Ibairen rola jokatuko du. Gainera, telesailaren historian lehen aldiz, entzumen murriztua duen pertsonaia bat egongo da: Iraia. Malen Azpirozek jokatuko du rol hori. Beste bi aktore gazte berri egongo dira: Iñaki Mujika eta Julen Castillo. Aitor Beltran —Soinujolearen semea— aktoreak ere parte hartuko du denboraldi berrian.

Ohiko moduan, neska-mutikoei zuzendutako fikzioa EITBren webgunean eta Go!azen-en aplikazioan ere ikusi ahalko da. Aplikazioan, gainera, pertsonaiek Goatsapp taldera bidaltzen dituzten mezuak, argazkiak eta bideoak ikusi ahalko dira. Fikzioak kontuak ditu Instagramen, Twitterren, Facebooken eta Tiktoken.