'Go!azen'-en katalanezko bertsioa hasi dira grabatzen TV3entzat

Aurreneko aldiz Kataluniako TV3 kateak euskarazko telesail baten bertsioa egingo du. Go!azen ETBko telesaila egokitu du Abacus ekoiztetxeak —Pausokarena da formatua—, eta Jo mai mai telesaila egingo du katalanezko katearentzat. Atzo hasi zituzten grabaketak, Bartzelonan.

Go!azen haurrentzat da, baina Jo mai mai gehiago izango da ikus-entzule nerabeentzat eta gazteentzat. TV3ek egunotan emango du fikzioaren gaineko informazio zehatzagoa. Hiru zuzendari izango ditu telesailak, eta musikak ez du Go!azen-en adinako garrantzia izango. Ez dute telesail musikaltzat joko, alegia. Edonola ere, egokitzapenean katalanezko hainbat kanta interpretatuko dituzte aktore gazteek.

Fikziozkoa ez, baina TV3ek duela urte batzuk euskarazko beste formatu baten egokitzapena egin zuen: Bocamoll. 2007an, Mihiluze-ren katalanezko bertsioa egin zuen Antartida ekoiztetxeak TV3entzat. Eta hura izan zen lehen aldia TV3ek ETB1en formatu bat egokitzen zuena. Orio Produkzioak ekoiztetxearena da Mihiluze.

Go!azen-en formatua Pausokak sortu zuen, 2008an, lehenbizi telefilmarekin —Xabier Zabaletak eta Alvaro Carmonak idatzi zuten gidoia—. Ondotik iritsi zen telesaila: lehen denboraldia 2009an eman zuen ETB1ek. Zazpi urteko etenaren ostean, ETBk telesaila berreskuratu zuen 2016an, eta orduz geroztik urtero egin du Pausokak fikzioa.

Joan den denboraldian, Go!azen-ek %3,3ko ikusle kuota izan zuen —euskaldunen artean, %8,7koa—. Hiru haurretik batek ikusten du telesaila ETB1en. Youtuben ere milaka ikustaldi ditu.

'Go!azen 10.0', martxan

ETBko Go!azen telesailaren hamargarren denboraldia, halaber, atzo bertan hasi ziren grabatzen, Donostian. Aktore berrien artean, Nerea Arriola egongo da; hainbat antzezlanetan aritzeaz gain, Super Txope Youtubeko pertsonaiarekin egin zen ezaguna, eta ondotik euskarazko websail batzuetan parte hartu du. Maitane begirale berriarena egingo du Arriolak.

Udalekuko ikasle berrien artean, bestalde, Ander Aierzak Boskoren rola jokatuko du; Xabier Elizaldek Anerrena egingo du; Haizea Astrainek, Learena; Marina Ostolazak, Noarena; Unai Arrietak ,Urtzirena; eta Unai Aranak, Mattinena. Horrenbestez, gutxienez zazpi aktore berri egongo dira telesailean.

Aurreko denboraldietan parte hartu zuten aktore batzuk ere agertuko dira atal berrietan: Andoni Agirregomezkorta, Maria Redondo, Mikele Arizkorreta, Kimetz Etxabe, Lorea Intxausti eta Nerea Elizalde, besteak beste.

Irabazi arte telesailaren hirugarren denboraldia, berriz, hilaren amaieran hasiko dira grabatzen. ETB1ek azarotik aurrera emango ditu Go!azen-en hamar atal berriak, eta ondoren, otsailean iritsiko dira Irabazi arte telesailarenak.