Bizkaiko Bertsolari Txapelketako finaleko hasierako agurra Harry Potterren doinuan egin zuen Nerea Ibarzabalek 2021ean, eta txapela jantzi zuen urte hartan. Baina ez da Ibarzabal Potterren magiaren eta abenturen zale bakarra Euskal Herrian, eta, 2023ko apirilean HBO Max-ek iragarri zuenetik telesail bat egingo dutela, asko daude zain. Bada, hasi dira telesaila grabatzen. HBOk filmaketen lehen irudia zabaldu du. Baina itxaronaldia ez da laburra izango: 2027. urtean estreinatuko dute Harry Potterren telesaila HBOk eta HBO Max plataformak.
Francesca Gardiner da telesailaren idazlea eta ekoizlea. Mark Mylod, berriz, ekoizle eragilea da, eta hainbat atal zuzenduko ditu. Bronte Film eta Warner Bros Television ari dira fikzioa ekoizten, HBOrekin batera. Heyday Filmseko David Heyman ere ekoizle taldean da, Bronte-ko Neil Blair eta Ruth Kenley-Lettsekin batera.
Erresuma Batuko Leavesdengo Warner Brosen estudioetan hasi dira telesaila filmatzen. Aktore taldean, Dominic McLaughlin mutikoak egingo du Harry Potterrena; Arabella Stantonek Hermionerena; eta Alastair Stoutek, Ronena. Gainera, Rory Wilmotek Neville Longbottomen rola jokatuko du; Amos Kitsonek Dudley Dursleyrena; Louise Brealeyk Madam Rolanda Hoochena; eta Anton Lesserrek Garrick Ollivanderrena. Taldean dira, halaber, Katherine Parkinson, Lox Pratt, Leo Earley, Alessia Leoni, Sienna Moosah, Bel Powley, Daniel Rigby eta Bertie Carvel aktoreak.
Telesaila fidela izango zaie J. K. Rowling idazlearen liburuei, eta idazlea bera ekoizle eragileen artean dago. Liburu sortan oinarritutako filmak HBO Max plataforman ikus daitezke.
