Pikara Magazine-k antolatutako Kazetaritza Feministari Buruzko IV. Kongresua egingo dute urriaren 15ean eta 16an Bilboko Bilborock aretoan. 25 hizlari izango dira bertan, eta, besteak beste, eskuin muturraren garapenaz, sexu indarkeria ikertzeko moduaz, gizarte mugimenduez eta sare sozialez hitz egingo dute; baita «beste Internet bat» eraikitzeaz, eta kazetarien eta oinarrizko kolektiboen arteko egituratzeaz ere.
Gai «konplexuak, zailak eta bortitzak» direla adierazi du Pikara Magazine-k ohar baten bitartez, baina horiei buruz hitz egitea «beharrezkoa» dela diote, «eztabaida osasuntsua eta ikaskuntza egokia izateko»: «Kazetaritza horixe da, geure burua zalantzan jartzea eta egunero ikastea, zintzotasunez, adeitasunez eta modu kolektiboan».
Hizlarien artean, besteak beste, Amagoia Mujika BERRIAko zuzendaria egongo da. Isabel Valdes, El País egunkariko Genero editorearekin hitz egingo du, ikuspegi feminista transbertsala hedabideetan nola landu aztertzeko. Deva Mar Escobedo kazetariak gidatuko du elkarrizketa.
Hitzaldiez gain, Lucia Martinez Odriozola Kazetaritza Feminista II. Saria banatuko dute. Unibertsitateko lanetan genero ikuspegia txertatzen duten kazetaritzako edo ikus-entzunezko komunikazioko ikasleen lana saritzea du asmo sari horrek.
