Movistar Plus ordainpeko plataformak Paga o muere. ETA en la caverna (Ordaindu ala heriotza. ETA leize zuloan) dokumental saioa estreinatuko du datorren astelehenean. Hiru atalez osatuta dago, eta hirurak jarriko dituzte egun berean. Bertan, ETAren iraultza zergaren inguruan ariko dira; plataformaren arabera, 15.000 enpresari inguruk jaso zituzten ETAren mehatxu gutunak, zeinetan dirua exijitzen zieten.
Saioan adibidetzat jo dute Jesus Guibert enpresariaren kasua. Marcial Ucin enpresako kudeatzailea zen, Azpeitian (Gipuzkoa), eta 1983. urtean ETAk bahitu egin zuen. «Ondotik, ia hiru aste pasatu ostean, aske utzi zuten, familiak ETAri 200 milioi pezeta [1,2 milioi euro inguru] ordaindu eta gero», dio plataformak. «ETAk urte luzez jarraitu zuen Guiberti mehatxu egiten». Enpresari haren alaba Maria Luisa Guibert da dokumental saiorako elkarrizketatu dituztenetako bat.
Lan berean elkarrizketatu dituzte Kepa Pikabea eta Antonio Alcocer Gabaldon ETAko kide ohiak.
Halaber, Enrique Molina Espainiako Auzitegi Nazionaleko fiskal ohiaren eta Carlos Bueren auzitegi bereko epaile ohiaren lekukotzak jaso dituzte.
Mediacrest ekoiztetxearen saio bat da. Iragarri dutenez, segurtasun indarren eta epaileen «ikerketa sekretuak» erakutsiko dituzte dokumental saioan.
