Nazioartean sona handia du Alemaniako Die Seriale websailen nazioarteko jaialdiak, eta egunotan egin dute 11. edizioa. Makusi plataformaren (EITB) Power Up euskarazko websailak hainbat hautagaitza zituen, eta edizio onenaren saria jaso du euskal ekoizpenak. Oliver Mend eta Rose of Dolls websailaren zuzendari eta gidoilariek jaso dute saria, Giessen hirian.
Beste jaialdi batzuetan ere saritu dute Power Up. Produ nazioarteko sarietan, gazteentzako telesail onenaren saria lortu zuen iaz.
Websaila A Film To Kill For Bizkaiko ekoiztetxeak egiten du Makusirentzat, eta bi denboraldi estreinatu dituzte orain arte. Aktore protagonistak Marina Ostolaza, Ibai Ugarte, Andere Garabieta eta Jon Lukas dira. Gidoilarien artean Eililis Rising eta Igor Ramos Peula daude, bi zuzendariekin batera.
Ekoiztetxe horrek, bestalde, beste sari batzuk irabazi izan ditu websailen beste jaialdi batzuetan. Egunotan Makusi plataforma emititzen ari den Mari Sorgin Ehiztari telesaila sortzaile horiexena da —ostiralero sareratzen dute atal berri bat—.
