Munduko egunkaririk prestigiotsuena da The New York Times, erreferentziazko kazeta prentsaren sektorean. Baina dena ez da urre; ez beti, behintzat. Ostegunean, 1.100 langilek baino gehiagok 24 orduko lanuztea egin zuten, NewsGuild sindikatuaren deialdiarekin bat eginez. Ehunka langile elkartu ziren Zortzigarren Etorbideko egoitza nagusiaren aurrean, Scabby arratoiaren konpainian —sindikatuaren borroken sinbolo bilakatu da Scabby—. Langileen ehuneko handi batek webgunean albisterik ez idaztea erabaki zuen ostegunean, eta ohi baino berri gutxiago zeuden irakurgai kazetaren atari digitalean. Paperean ohiko moduan argitaratu zen atzo egunkaria.
1981. urtetik ez zen halako lanuzterik The New York Times-en. Azken hogei hilabeteetan negoziazioetan aritu dira NewsGuild sindikatuko ordezkariak eta enpresako zuzendaritza, eta langileen ordezkariek iragarri zuten grebara joko zutela akordiorik ixten ez bazen. Sindikatuak kritikatu du azkenaldian enpresak milioi euro ugari gastatu dituela negozio berrietan eta akzioetan, baina langileentzat hobekuntzak ez direla inflazioaren araberakoak izan; 2020tik soldatak ez direla igo ohartarazi dute, eta, bitartean, inflazioak markak hautsi dituela. Langileen ordezkariek diote badela garaia kudeatzaileek kazetarien balioa aintzat hartuko duen eskaintza egiteko. Enpresak %2,8ko soldata igoera eskaini du, eta langileek lau urtean batez beste igoera %5,25 izatea nahi dute. Oinarrizko soldata urtean 61.680 eurokoa izatea eskatu du sindikatuak —gaur egungoa urtean 42.700 eurokoa da—.
Grebaren arrazoiak ez dira soilik soldatengatik izan. Telelanean aritzeko politika egokiagoak eskatu dituzte langileek, eta ebaluazio sisteman arrazakeriarik ez egotea. Baina bada beste puntu garrantzitsu bat: erretiro sariak. Zuzendaritzak egindako proposamenak erretiro sariaren baldintzak asko okertzen zituela salatu zuen sindikatuak duela egun batzuk. Osasun arretarako funtsean ere izan dituzte desadostasunak langileek eta zuzendaritzak. Kontuan hartu behar da AEBetan osasun zerbitzuak eta pentsioak esku pribatuetan daudela.
Joe Kahn The New York Times-eko editore zuzendariak esan du desilusioa eragin diola sindikatuaren erabakiak: «Grebak gertatzen dira elkarrizketak gotortu egiten direnean. Baina, egun, ez gaude egoera horretan. Zuzendaritza eta NewsGuild sindikatua proposamenak trukatzen ari gara, akordioaren bidean».
Lan gatazka gehiago
AEBetako beste komunikabide batzuetan, bestalde, erabaki murriztaileak ari dira hartzen azkeneko asteetan. CNN taldeak ehunka langile kaleratzeko plan bat abiatu berri du; BuzzFeed hedabideak langileen %12 kaleratu ditu; The Washington Post egunkariak igandeko astekaria itxiko du urtarrilean; eta tokiko hedabide txikiago batzuetan lanuzteak egiten ari dira azken asteotan.
'The New York Times'-eko 1.100 langilek 24 orduko greba egin dute
NewsGuild sindikatuak soldatak igotzeko eskatu du, baita erretirorako baldintzak hobetzeko ere
![The New York Times egunkariko langileak protestan, herenegun, greba egunean. JUSTIN LANE / EFE. The New York Times egunkariko langileak protestan, herenegun, greba egunean. JUSTIN LANE / EFE.](https://www.berria.eus/uploads/s1/72/69/34/p035-f01.jpeg)
Iruzkinak
Ez dago iruzkinik
Ordenatu