Amets Aranguren. (Iruñea, 1998)

Nafarroako Kontserbatorioan ikasketak amaitu berria da Amets Aranguren, baina aurretik dabil buru-belarri lanean beste lau lagunekin osatzen duen proiektuan: Ibil Bedi-n. Ahotsez, saxofoiaz eta teklatuez arduratzen da. Bi disko argitaratu dituzte (Berandu baina garaiz 2019an eta Beltxarga Beltza 2021ean), eta jakinarazi du bidean dela beste bat ere. Argia-n kultur ekitaldien kronikak egiten ditu, baina kultura ez da haren kezka iturri bakarra. Nafarroako Hitza-n idazten dituen iritzi artikuluetan ikus daiteke hori. Ez da gazte antolakunde bateko militantea, baina esan izan du modu irekian bat egiten duela alde batekoekin bestekoekin baino gehiago.