Ez genekien Hegoaldean zinema saloiek bakazioak hartzen zituztenik. Guardiako botikak bezala zirela uste genuen guk. Egun libre batzuk bazituztela ohartuak ginen. Gabonetan, esaterako. Edo astearen hasierako lanegun latzetan, jende gutxik duelako umore nahikoa astelehen buruzuri batean zinemara joateko. Hobe pantailak itzali. Piztuko ditugu gero. Asteazkenean, adibidez, egun politagoa delako. Kasik feriakoa. Izan ere, asteazkenetan suertatzen dira estreinak iparrean…
Ez genekien, ez. Liatuak ginen Hegoaldean Zinemaldiaren programazioa arakatzen. Baina orain badakigu. Leitu dugu Miarritzeko Le Royaleko atarian. Irakurri dugu bertako batzorde zinezaleak bidalitako post-etan: Oporrak hartu berri dituzte. Irailaren 9an dira bueltatzekoak. Ordezkari finak utzi dituzte bai Donibane Lohizunen, bai Baionan, Le Select eta L´Atalante.
Bietan bada pantailan Miarritzekoek urtearen bederatzigarren hilabetearen bigarren asteazkenean proposatuko diguten film itzela, Julia Ducournauren Alpha.
Badakit. Ederki asko jakin ere. Larrutu zuten Cannesen. Jipoitu. Ederki berotu. Bere zeluloidea zarramazkatu zuten. Errukirik gabe. Gustura. Haginka nahi izan zituzten bere irudiak hautsi. Balent sorta urrik baino inork ez zuen bere alde egin.
Lastima. Ohartuko dira inoiz zeinen erraturik izan ziren. Beharbada ez dute aitortuko, zaila baitzaigu gizakioi atzera ematea gure uste ustel sendo petraletan. Erraietan sumatuko dute baina tronpatu zirela. Ez pentsa, hasiak dira, dagoeneko, dudatan erortzen. Noiztik? Ekainetik. Zer gertatu ote zen hilabete horretan? Italiako Bolonian, urtero bezala, 6tik 26ra arte ospatu zen Biografilm jaialdia. Bertan, Raw bere lehenengo filmarekin bazterrak nahastu eta Titane bere bigarrenarekin Canneseko Urrezko Palma lortu zuen Julia Ducournauk ikusleen saria eskuratu zuen.
Ohartuko dira inoiz zeinen erraturik izan ziren. Beharbada ez dute aitortuko, zaila baitzaigu gizakioi atzera ematea gure uste ustel sendo petraletan. Erraietan sumatuko dute baina tronpatu zirela. Ez pentsa, hasiak dira, dagoeneko, dudatan erortzen.
Ikusleena?! Bai, sarri gertatu ohi den moduan, Ducournauri garaikurra luzatu ziotenean begirada justuagoa, ederragoa, zuzenagoa erakutsi zuten zinemazaurituek sasiko adituek baino.
Erabiltzen ditugun hizkuntzek ez dute hitz nahikorik Alpha-n ikusten duguna adierazteko. Mundua bere akaberara ari da iristen (noiztik, jainkoarren!?). Airean dabilen zerbaitek gizateria kutsatzen du. Errazegia litzateke, nik uste, hiesaz akordatzea. Hutsala, hutsal oso, koronabirusarekin parekatzea. Askoz urrunekoagoa, askoz sakonagoa, askoz hilgarriagoa ere da hemengo metafora (metafora bada ere). Hauts gorri batek hartzen du pantaila, eta kutsatuak pixkanaka-pixkanaka bihurtzen dira harrizko. Marmolezko eskultura ikara/izu/zoragarriz betetzen da zeluloidea. Kamerak ez du begirada alderatzen, apartatzen petrifikazio horren prozesua guregana ekarri nahi/behar baitu. Eta gu, zur eta lur, sor eta lor. Begirada irudietatik kendu ezinik; arnasestuka hauts gorriak itotzen gaituelako.
Maite ditugu gutako batzuok body horror generoko filmak. Badakizue zertaz ari naizen; mota horretako zeluloidean gure gorputza eraldatzen da. Fisikoki metamorfizatzen du. Ohikoak diren organo, errai, tendoiez gain hasten dira barrenetan agertzen gureak ez diren… kreaturak, likidoak, formak, sustantziak… Kanpotik sartutako metalezko, azidozko mintzak hasten dira hazten… Hori da, bai, Body Horror: dagoeneko zu ez zara zu…
Alpha body horroreko filma da. Alta, beste kontu batzuk esploratzen ditu oldarki. Beldurra, esaterako. Eta ez bakarrik gaixotasunari. Baita desagertzeari ere. Maitasuna, esaterako. Erresistentziarako tresnaz erabiltzen den amodioa, muturreko maitasun terminala…
Zapuztu zuten Cannesen. Txikitu. Birrindu. Balent sorta urri batek baino ez genizkion gure gorputza eta gure espiritua eskaini erregalu, sakrifizio. Gero, Bolonian, ikusle oldartsuek agerian utzi zuten haien elkartasun zoroa. Iparraldean da Alpha ikusgai. Egunotan. Le Royal aretoarekiko leialak eta fidelak bazarete baina, ez ahaztu, oporretan daude. Irailaren 9an dira bueltatzekoak.
