Antonio Altarriba gidoigileak jaso du Espainiako Komiki Saria

Antonio Altarriba gidoigileak (Zaragoza, Espainia, 1952) eskuratu du, Kim marrazkigilearekin batera, Espainiako Komiki Saria, El arte de volar lanarengatik. Saria 20.000 eurokoa da. Liburuak Altarribaren aita zenaren istorioa kontatzen du. Aurreko mendean Espainian izandako miserien kontaketa egiten du Altarribak liburuan, 1936ko gerra eta erbesteratzea ardatz harturik.

Gasteizen bizi da Altarriba. Gidoigilea eta ikertzailea da, eta azken urteotan komikiaren ikerketan espezializatu da. Filologia Frantseseko lizentziaduna da, eta frantses literaturako irakasle da Euskal Herriko Unibertsitatean, Gasteizko fakultatean.