Antzerkia maite dutenen txaloa jaso du Iñaki Beobidek

Kaleko ekitaldietako batzuetan euriak eragozpenak sortu baldin bazituen ere, arrakastaz ospatu zuten atzo Antzerkizale Eguna Villabonan (Gipuzkoa), Ehaze Euskal Herriko Antzerkizaleen Elkarteak estreinakoz antolatua. Arratsean Gurea antzokian egindako ekitaldi ofizialean, Ehazek emandako saria jaso zuen Iñaki Beobidek, urteetan euskal antzerkiaren alde —Jarrai taldearekin bereziki— egindako lana eskertzeko.

Festa eguna hasteko, Errebote plazan bildu ziren antzerkizaleak eguerdia baino lehen, eta Porrotx eta Mari Motots pailazoek ospakizunari zegokion pregoia irakurri zuten. Gero, hainbat talderen emanaldien ostean, herri bazkaria egin zuten, eta haurrentzat txokolate jana eta buruhandiak izan ziren. Hainbat antzerki pieza laburren ondotik egin zen Gurea antzokiko ekitaldi ofiziala, eta, hartan, Iñaki Beobidek saria jaso eta gero, Sarean zintzilikatua obra eskaini zuen Edurne Agirrezabalak. Bull disko jartzaileak gidatutako dantzaldiarekin amaitu zen eguna, gaztetxean.