'Basoaren ilunean dantza'

Beste tendentzia batzuk gogor jotzen ari badira ere, Euskal Herrian rock-and-rollak badu oraindik indarra, eta argi erakusten ari da hori azken asteotan Bazka taldea. Bost lagun zahar elkartu eta proiektu berria sortu dute, aurretik ere egindakoen ildotik doan egitasmoa. Rock eta hardcore azkarra batzuetan, geldoa eta pisutsuagoa besteetan, ahots melodikoak garrasiekin tartekatuta, baina hasieratik bereganatzen zaituzten akordeak, burua astintzeko modukoak guztiak ere. Basoaren ilunean dantza egiteko gonbitea, animalia basatien artean, haien antzera. Nostalgikoak izan garenontzat, baina baita proiektu berri honekin ezagutu dituztenentzat ere, guztiak asetzeko bezalako bazka da disko hau.