Urtebeteko etenaren ostean, berriz ekingo dio Bertsozale Elkarteak Bertso Egunari: urtarrilaren 27an egingo dute, Mungian (Bizkaia). Etenaldia iragarri zutenean jakinarazi zuten ekitaldia Euskal Herrira zabaldu nahi zutela, hainbat urtez jarraian Donostian egin ostean; ekitaldia «ibiltaria» izango dela berretsi dute orain, eta eskerrak eman dizkiote Donostiako Udalari urte luzez emandako laguntzagatik.
Egun osoko egitaraua prestatu dute, eta Mungiako Udalaren eta Taket Mungiako Bertsolari Alkartearen laguntza izan dute horretarako. Oraingoz, egitarauaren zati bat baino ez dute aurreratu: urtarrilean emango dituzte xehetasun gehiago. Goizean, mahai inguru musikatua egingo dute Mugire txokoan. Eguerdian, hiru bazkari eskainiko dituzte hiru elkarte gastronomikotan, eta bakoitzean bina bertsolari arituko dira; 60-80 lagunentzako lekua izango da bazkari bakoitzean.
Eguneko saio nagusia arratsaldean izango da: Manex Agirre, Amets Arzallus, Oihana Bartra, Unai Iturriaga eta Sebastian Lizaso arituko dira bertsotan Alaitz Rekondoren esanetara. Bertsosarrerak.eus atarian jarriko dituzte sarrerak eta bazkaritarako txartelak salgai, urtarrilaren 4an.
Bertso Eguna urtarrilaren 27an egingo dute, Mungian, urtebeteko etenaren ostean
«Ibiltaria» izango da aurrerantzean, hainbat urtez Donostian egin ostean. Hilaren 4an jarriko dituzte sarrerak salgai, 'Bertsosarrerak' atarian
Iruzkinak
Ez dago iruzkinik
Ordenatu
