'lur azpira itzuli'
Egilea. Braulio. Argitalpena. Autoekoizpena
Egituren konplexutasuna, garraztasun orokorra eta bortizkeria dira nagusi berriz ere bost kantuko EP honetan. 2020an argitaratu zuten lehen lau kantuko CDa ondarroarrek, eta esan genezake lan berri honekin hark zeuzkan bertuteak perfekzionatu dituztela. Gaur post-hardcore gisa ezagutzen dugun esparruan sailkatu dezakegu hau ere. Melodiak, hortaz, egon badauden arren, erritmoen taupadetan garatzen dira han eta hemen. Kontzertuetan, gainera, efektu hori bereziki da nabarmena Ustelkeri eta Kalapitxixe piezetan. BAP taldearen Lehertzeko garaia kantuaren bertsioa ere nabarmendu behar dugun arren, Black Elk (Altze Beltza) da akaso harrigarriena, bere zortzi minutuko soinu konprimatu eta melodia gustagarria direla eta. Teknika eta sentimendua uztartzen dituen hirukote gogotsua, inondik ere.
