'Cosmic Lexicon'

Zazpi urte pasatu dira Atom Rhumbak azken diskoa argitara eman zuenetik, baina merezi izan du itxaronaldiak. Taldean aldaketak izan badira ere, Cosmic Lexicon izeneko lan berria ez da nolanahikoa, eta taldekide guztiek erakutsi dute, beste behin ere, talenturik ez dela falta. Hamabi abestietan anabasa izugarri bat dago... algara, tristura, amorrua eta poza, denak nahasten diren horietakoa. Guztia rockez bustia, noski, blues, punk, surf eta garage doinuek guztiek beraien lekua badute ere, elektrikoak dira akorde denak, aurreko lanetako esentzia mantenduz baina urte hauetan ikasitakoa lehengoari erantsiz. Azken finean, Atom Rhumba izaten jarraitzen dute, baina helduago dira, eta ez adinean bakarrik.