Aurretik iragarritako emanaldiei beste 21 gehitu dizkio gaur Donostiako 55. Jazzaldiak. 21 dira guztira, eta doakoak izango dira. Hain zuzen ere, Kursaalaren inguruan egongo diren bi agertokitan banatuko dira emanaldi horiek.
Doako emanaldi horiek emango dituzten artista guztiak aurretik ere izan dira jazzaldian. Izan ere, antolatzaileek adierazi dutenez, «azken urte hauetan agertoki horietan egon diren hemengo talde talentudunak ezagutarazi nahi dira».
Kontzertuek hainbat berezitasun izango dituzte; izan ere, antolatzaileek musikari eta taldeei eskatu diete ahalegin bat egin dezaten euren musika «ganberakoa» izan dadin. Hau da, perkusiorik gabe eta agertokian hiru pertsona baino gehiago izan gabe aritu beharko dira. «Jendea eserita egotera gonbidatzen duen giroa sortu nahi dugu».
Antolaketaren ikuspegitik, Kursaaleko terrazak taberna-jatetxe terraza bihurtuko dira, eremu mugatua hartuko dute, eta edukiera ere mugatua izango da. Mahaien arteko tartea bermatuko da, jendea mahaien inguruan eseriko da, eta hortxe zerbitzatuko zaizkio edariak eta jakiak.
Honako hauek dira emanaldi horietan izango diren artistak: Connection Trio, Les Fous, Sara Mansilla y Los Juanes, Randy Greer Trio, Around Midnight, Sara Zozaya, Jaso-Gimenez Escrich Trio, Los Juanes, Sean Clapis Duo, Idoia Asurmendi, Lemy River, Matilda eta Indian Feathers. Azkeneko lau musika talde horiek Katapulta Tour Gipuzkoa 2020 zirkuituaren eskutik datoz.
Donostiako Jazzaldiak sortutako Txikijazz egitarauak, berriz, zortzigarrena izango du aurtengoa. Uztailaren 23tik 26ra egingo da, eta egungo egoerara egokitutako egitaraua izango du. Musika izango da osagai nagusia, eta, osasun neurriak direla-eta, ez da antolatuko haurrentzako jarduera paralelorik.
Familian gozatzeko lau kontzertu eskainiko ditu jazzaldiak, guztiak agintariek emandako babes eta higiene araudiak betez. Maskara derrigorrezkoa izango da 6 urtetik aurrera, eserlekuak esleitu egingo dira, eta une oro bete beharko dira antolakuntzaren jarraibideak.
Bi kontzertu Tabakalerako Kutxa Kultur terrazan izango dira. Edukiera 74 pertsonakoa izango, da eta pertsonako 3 euro kobratuko da:
– The Binilo’s: uztailaren 23an, 20:30ean.
– Los Juanes: uztailaren 24an, 20:30ean.
Beste bi kontzertuak Kursaaleko terrazan izango dira, doan, eta sarrera mugatua izango da adingabeekin doazen familientzat (300 lagun guztira):
– The Binilo’s: uztailaren 25ean, 12:00etan.
– Sara Mansilla eta Los Juanes: uztailaren 26an, 12:00etan
Hona hemen programazio osoa.
