Euskadi Saria irabazteko hautagai izateko, lana aurkeztu beharko da

Aldaketa batzuekin datoz literaturako aurtengo Euskadi Sariak, gaur Eusko Jaurlaritzako Kultura Sailak jakinarazi duenez: batetik, hirutik zortzira igo dute modalitateen kopurua eta, bestetik, lana aurkeztu egin beharko da saria irabazteko aukera edukitzeko.

Literatura sarien modalitateak hauek izango dira: euskarazko eta gaztelaniazko literatura, haur eta gazteen euskarazko eta gaztelaniazko literatura, euskarazko literatura itzulpena, literatura lanaren ilustrazioa. eta euskarazko eta gaztelaniazko saiakera. "Hartara, euskal idazleen parte hartzeko aukerak handitu egin nahi dira", dio Kultura Sailak. Garaile bakoitzak 18.000 euro jasoko ditu.

Hautagaiak aurkezteko epea bihar hasiko da, Liburuaren Nazioarteko Egunean, eta maiatzaren 31n amaituko. Lanak iazko urtarrilaren 1etik abenduaren 31era artean argitaratutakoak izan beharko dira. Edozein pertsona fisikok zein juridikok aurkeztu ahal izango du hautagaitza -egilearen onespen dokumentatuarekin-, baita egileak berak ere.