Gizarte arrakastaren ifrentzua

Paddy Chayefsky Television Laurel Award saria jaso zuen John Wellsek 2007an, telebista sailetako idazletzan ekarpen handia egin dutenen egileentzako ohorea. Ezezagun samarra bada ere, Wellsek ospe handia du AEBetako telebista giroan; dozenaka sari eta izendapen eskuratu ditu ekoizle eta zuzendari lanetan azken urteotan. Orain, pantaila handian lehen saioa egin nahi izan du: krisialdiaren gaineko film bat.

Independente gisa aurkeztu dute The Company Men, baina beste behin ere zalantza handia sortuko du izendapen horrek. Filma Weinstein anaien guardasolaren azpian dator, eta aktore taldeari erreparatuta argi dago ez dela oso aurrekontu txikiko filma izan. Nolanahi ere, nahiko kritika onak lortu ditu AEBetan.

Gaur egungo krisialdi latzaren ispilua ikusten ahal bada ere, kontua da ezagutzen ari garen hau bere gordintasunean hasi aurretik hasi zela gaiaren inguruan Wells lanean. 90eko hamarkadaren hasierako krisialdiak bere inguruko hainbatengan izan zuen ondorio suntsigarria ikusita, irabazleen eta galtzaileen inguruko parabola moduko bat idazteari ekin zion.

Egun batetik bestera lanik gabe geldituko diren hiru gizonezko dira filmeko protagonista nagusiak. Ordu arte, gizarte arrakastaren uhinaren gainean bizi izan dira, harroputz eta axolagabe. Baina, lana galtzearekin batera, haien hareazko gazteluaren zimendua zein ahula den ohartuko dira. Familiakoen eta ingurukoen aurrean egoera berrira nola egokitu izanen dute kezka nagusia.

Maila handiko aktoreak dira The Company Men honetakoak. Ben Affleck da protagonista nagusia; Bobby Walkerrena egiten du, galeraren alde garratza ezagutuko duen irabazlea. Harekin batera, beterano handiak: Kevin Costner, Tommy Lee Jones, Maria Bello eta Chris Cooper.

'THE COMPANY MEN'

Zuzendaria: John Wells.

Aktoreak: Ben Affleck, Kevin Costner, Maria Bello, Tommy Lee Jones, Chris Cooper, Craig T. Nelson, Rosemarie DeWitt.

Herrialdea: AEB.

Urtea: 2010.

Iraupena: 109 minutu.

Estreinaldia: Gaur estreinatuko dute Hego Euskal Herrian.