Inazio Bastida Uranga Etxeberritxo pandero jotzailea hil da, bihotzekoak jota. Haren aldeko hileta elizkizunak bihar egingo dira, ostiralarekin, 19:00etan, Azpeitiko Soreasuko Sebastian Donearen parrokian.
Inazio Bastida Uranga 1943an jaio zen, Azpeitiko Oñatz auzoko Etxeberritxo baserrian. Soinu jotzaile askorekin aritu da panderoa jotzen, bere kasa ikasi ondoren plazetan aritzen gazterik hasi zenez geroztik.
Joakin Errasti Epelarre soinu jotzailearekin batera Euskadiko Trikiti Txapelketako finalerdietara iritsi zen 1979an. Epelarrerekin ez ezik, Astiasaran anaiekin ere maiz aritu zen.
Azken urteetan Xabi Solanorekin ere jo izan du hainbatetan, eta Esne Beltza taldearen Esne Zopak proiektuan parte hartu du.
Panderoa jotzearekin batera alaitasuna eta bizipoza transmititzen zuen beti oholtza gainean Etxeberritxok.
