Iruñean Bob Dylan ikusteko sarrerak bihartik salgai

Bob Dylan Iruñean ariko da ekainaren 24an (21:30), zezen-plazan, eta sarrerak bihartik jarriko dituzte salgai. Sarreren prezioa 50 eurokoa izango da, eta hemen eros daiteke sarrera:www.inoutnavarra.com, www.ticktackticket.com, 902150025, Callate la Boca (Estafeta 21), Carrefour eta Hiper Leclerc-en.

Zaragozako (Espainia) Expo 2008 erakusketan jo ostean helduko da Iruñera Dylan, eta Modern Times 2006an argitaraturiko lana aurkeztuko du. Kritikak gogo onez jaso zuen bluesaren eta rockaren sustraietara begira eginiko disko hori. Bere ibilbideko estudioan grabaturiko 32. lana da Modern Times.

Duluth herrian (Minnesota, AEBak, 1941) jaio zen Robert Allen Zimmeram, Bob Dylan. Musika munduan 45 urtetik gora daramatza, eta rockaren historian eragin eta itzal handienetakoa duen artista da. 2006ko uztailean Donostian aritu zen, Zurriolako hondartzan.

Hamabost mila lagun sartzen dira Iruñeko zezen-plazan, eta antolatzaileek betetzea espero dute.

Bi egun lehenago -ekainaren 22an-, Juanes ariko da hantxe, 22:00etatik aurrera.