Jose Ricardo Lozano eta Luis Haranburu Altuna irabazle Donostia Hirian

Gaur jakinarazi dituzte 2007ko Donostia Hiria literatur lehiaketako irabazleak, eta euskarazkoan Jose Ricardo Lozanok irabazi du ipuinen arloan eta Luis Haranburu Altunak antzerkiarenean.

Hasperenka ipuinarekin eskuratu du saria Lozanok (garaikurra eta zazpi mila euro). Euskarazko 40 ipuin aurkeztu dituzte, eta Iñaki Aldekoa, Miren Azkarate, Enkarni Genua, Jesus Mari Lasagabaster eta Mari Jose Olaziregi izan dira epaimahaikideak.

Haranburu Altunak, berriz, Josafat izeneko antzerki lanarekin irabazi du (garaikurra eta hamalau mila euro). Euskarazko bederatzi antzerki lan aurkeztu dituzte, eta Aurelia Arkotxa, Imanol Elias, Daniel Landart, Ana Toledo eta Patri Urkizuk osatu dute epaimahaia.

Gazteleraz ipuinen arloan (660 lan), Marcelo Lujanek irabazi du (El desvio izenburua). Antzerkiarenean (103 lan), Francisco Romerok (Shylock Gallerie).