B.O.T.H.
'B.O.T.H.'
Argitaratzailea: Egilea editore.
Gogotsu ekin dio Bizkaiko laukoteak bere ibilbideari. Zazpi kantu propioz osatutako disko batean, hardcore estiloaren zaleak asebetetzeko moduko indarra erakutsi dute. Abiaduren arteko jokoan erraz mugitzen dira Itzalpean kantuarekin diskoari hasiera ematen diotenetik. 195, minutua nekez gainditzen duen pieza motza, erakusgarri dugu 79 segundok zer eman dezaketen. Garaziren ahotsak beste hiru partaideen babesa jasotzen du laneko pasarte askotan. Orokorrean, diskoaren azken kantuetan maila dezente igotzen dela uste dugu. Gainera, ezin alde batera utzi gitarraren boterea eta irudimenez jantzitako soloen presentzia. Legearen zaindari eta Malko isilak kantuen zati instrumentalen balioak (gitarra berriz errege) puntu gehiago ematen dizkie. Hala bada, norabide anitzeko ibilbidea egiteko gaitasuna erakutsi dute.
