Edison Machado
'Edison Machado & Boa Nova'
Diskoetxea: Far Out Recordings.
Ingalaterrako diskoetxeak Edison Machado Brasilgo bateria jotzaile mitikoaren grabazio ezezagun hau plazaratu berri du. 1979an jasotakoa da, New Yorken, eta musikaria sasoian zegoela nabaritzen da grabazioko lehen doinutik hasita, Porto Feliz dantzagarria entzunda. Gainerako hamar kantuak sanba eta hard-bop estiloen bazterretatik kiribiltzen dira, lan sofistikatua, baina, era berean, basatia sortzeko. Musikariak gustura ari dira; batzuetan, kontrolpean, eta, besteetan, etorri askeari lotuta. Brasilgo diktaduraren itzaletik iheska iritsi zen Machado New Yorkera, eta ihesaldiari zukua atera zion, Ipar eta Hego Amerikako jazzaren tradizioak eta Machadoren sanba berrikuntzak uztartuz.
