Mende beteko bluesa

Ia azken unera arte egin zuen gustukoen zuen hura, pianoa jotzea. Urrutira joan gabe, iazko uda hasieran Hondarribia Blues jaialdian izan zen. Udaberri honetarako ere zenbait emanaldi hitzartuak zituen, baina ez du horietan egoterik izango.Atzo hil zen Pinetop Perkins blues musikari handia, Austingo (Texas, AEB) bere etxean, 97 urte zituela eta bihotzekoak jota. Deltako bluesaren garai oparoko azken kideetako bat zen Perkins. Nortasun handiko estiloa zuen pianoa jotzen eta beste zenbait blues musikarik asko estimatzen zuten bere ahots sarkorra ere. Sarritan jo izan zuen Earl Hookerrekin edo Muddy Watersekin. Clint Eastwood zinema zuzendariaren Piano Blues dokumentaleko protagonistetako bat izan zen Pinetop Perkins, Jay McShann, Dave Brubeck eta Marcia Ballekin batera. 1913an jaio zeneta 1920an hasi zen bluesa egiten.•