Joan den larunbatean jokatu zen Xilabako lehen kanporaketa saioa —Maddi Ane Txoperena gailendu zen—, eta gaur izan da bigarrena. Domintxainen (Zuberoa) jokatu dute, eta Miren Artetxe Sarasola nagusitu da, 342,5 puntu eskuratuta. Hala, zuzenean bigarren faserako sailkatu da Artetxe, eta Muskildin (Zuberoa) kantatuko du hurrengo, abenduaren 13an.
Artetxeren atzetik, hala geratu da beste bertsokideen sailkapena: Haira Aizpurua Ibargarai (330), Josu Txoperena Iribarren (304,5), Joanes Etxebarria Martinez (294,5), Xermin Cablong Mounein (285) eta Haize Lekuona Blanco (278,5).
Amaiur Lujanbio Agirrek jarri dizkie gaiak bertsolariei, eta epaile lanetan, berriz, Zuhaitz Olazabal Susperregi, Abel Zabala Elizazu, Lur Renteria Maleta eta Ortzi Murua Berra aritu dira.
Hurrengo saioa, Ainhoan
Xilabako hurrengo saioa, artean lehen fasearen barnean, heldu den larunbatean izango da, Ainhoan (Lapurdi). Battit Crouspeyre, Johaine Sarraillet, Mizel Mateo, Patxi Iriart, Ramuntxo Chrisy eta Xan Alkhat ariko dira kantuan, 17:00etan hasita.
