Aurreikuspenak zapartatu ditu Bonnat Helleu museoak. Bertako zuzendari Barthelemy Etxegoien Glama kontent agertu da zazpi hilabete pasatu ondotik 100.000 bistari baino gehiago pasatu direlako museotik, eta testuinguru horretan estreinatzen dutelako Mitologiak erakusketa. Azarora artio luzatuko den behin behineko erakusketa horretan, Euskal Herriko, Mediteraneoko, Ekialde Hurbileko, Mexikoko, Ozeaniako eta Afrikako mitologiak elkarrizketan eman dituzte kaleidoskopo formatuko gela batean. Ehun obra inguru biltzen ditu erakusketak; Parisko Louvre eta Quai Branly-Jacques Chirac museoek obrak prestatu dituzte mundu osoko mitologiak elkartu ahal izateko.
Bonnat Helleu museoan mitologiak idazten, biltzen, aktibatzen eta justuki irudikatzen dira, eta lau aditz horien inguruan eraiki dute erakusketa Etxegoienen ustez. Mundua mitologiaren bidez kontatzeko helburuz aritu dira lanean, eta erakusketak ikerketa lan handia eskatu duela zehaztu du Benjamin Caule komisarioak. Ikusgai den emaitzara arribatzeko, mitologia dokumentatu zutenen izen batzuk aipatu ditu, eta hain zuzen ere, ikerlari horien liburuak ikusgai eman dituzte museoko sarrera gela handian. Felix Arnaudin, Eugene Camoreyt, Jose Migel Barandiaran eta Julien Vinsonenak dira obra nagusiak. Liburu horien ezkerrean, testu mitologikoz bete buztineko taulatxo iraniar bat ageri da. Jesus Kristo aitzineko 2000. urte ingurukoa da, Mesopotamiako Nippur eskualdekoa.
Hortik hurbil, harrigarria badirudi ere, elkarren ondoan eman dituzte Greziar garaiko Homeroren bustoa eta Owantshooziko artisauek eta diseinatzaileek egin lamina baten maskara. «Mitologiak irudikatzeko hainbat manera daude, eta hemen ikus dezakegu iragana eta oraina batuz mitologia aktiba daitekeela, eta ez dela gauza hila» kontatu du museoko zuzendariak.
«Mitologiak irudikatzeko hainbat manera daude, eta hemen ikus dezakegu iragana eta oraina batuz mitologia aktiba daitekeela, ez dela gauza hil bat»
BARTHELEMY ETXEGOIEN Museoko zuzendaria
Hastapenetik argi utzi du erakusketak denboran barnako zubi bat markatu nahi duela mitologia transmititzeko gisan. Etxegoien: «Mitoak ez dira bakarrik iraganekoak gure iruditeria garaikidea eraikitzen segitzen dute. Erakusketa honekin gainera, ohar daiteke gai unibertsala dela mitoen gaia, mundu osoan irudikatzen baitira hainbat maneraz».
Gai bera hainbat obratan
Mari Garai gelan da erakusketaren muina. Erakustokia modu zirkularrean antolatu dute, obra bakoitzak bertze obrekin mirail efektua ukan dezan. Zentrotik hasita, bazterrei buruz daude obrak guziak, eta labirinto gisako bat osatzen dute denek, elkarri begira balira bezala. Halere, ordena jakin batean bisita daitekeela nabarmendu du Etxegoienek, eta galtzeko arriskurik ez dela nabarmendu du.
Obra nabarmenenak presentatu ditu zuzendariak, eta, bertzeak bertze, San Jurgiren bizia irudikatzen dituen hiru obra agerian eman ditu. Esplikatu duenez, bigarren mendean bizi izan zen giristinoa zen Jurgi, eta dragoi baten kontra borrokatu zeneko gudua ikus daiteke hainbat obratan. Hain zuzen ere, Raffaellok irudikatu zuen tindu batean Berpizkundean. Baina Gaizkiaren eta Ongiaren arteko guduka Musa Ibn Istifanek ere irudikatu zuen berantxago, 1699an, buztin errez egin laukitxo batean. Eta San Gregorioren bizi osoa irudikatzen duen Ne’meh al-Musawwiren urre koloreko olio tindu bat ere ikusgai eman dute, denak elkarren ondoan.
Horien ondoan, elkarrizketan eman dituzte hartzaren aldaera mitologiko franko. Batetik, Euskal Herriko ihauteetan agertzen dena irudikatu dute zutik, gela erdira salto eginen balu bezala. Thomas Loiathoren obra da, ardi larruz, sokaz eta oihalez egina. Hartz handiari kasik kolaturik, berriz, bada Izturitzeko harpeetan (Baxenabarre) atzeman hareharrizko zizelkadura ttipi bat, baita Marquayengo babeslekuan (Frantzia) atzeman silexazko hartz ttipi bat ere. Zizelkadurez gain, Valere Bernarden Jean de l’Ours grabadurak osatzen du hartzaren historia; emazte baten eta hartz baten harreman batetarik sorturiko izakia irudikatzen du.
