NATION OF LANGUAGE
'Dance Called Memory'
Diskoetxea:Sub Pop.
Nation of Language taldeak bost urte eskasean kaleratzen duen laugarren diskoa da Dance Called Memory, eta hain epe laburrean New Yorkeko hirukoteak izan duen garapenaren erakusgarri ere bada. Sub Pop-ek fitxatu du taldea, baina ez duzue hemen aurkituko grungearen sustatzaile izan zen zigiluaren eskua. Nation of Languagek 1980ko hamarkadan loratu zen pop sintetikoan arakatzen du, baina ez da mimetismoaren tranpan erortzen, eta, batik bat, melodia ederrekin janzten ditu kantuak. OMD (Inept Apollo) eta Future Islandsen (Silhouette) artean mugitzen da, eta Talk Talk-en malenkonia ere ekartzen du gogora zenbaitetan.
