Lua Kastore protagonistaren barne bidaian oinarrituko da Oihane Enbeitak, Andoni Gartziak eta Eneritz Zeberiok garatuko duten antzezlana. Ma kolektiboko kideak dira hirurak, eta taldearen lehen urratsetan jaso dute Elkar Fundazioaren beka. Antzezlanaren sormen prozesuaren hasieran daude oraindik, eta egin asmo dutenaren lehen zertzelada batzuk aurreratu dituzte: diziplina anitz eta "sinbolo geruza" ugari uztartuko dituzte, eta planteamendu poetiko batean oinarrituko da ikuskizuna. Gorputzaren, hitzaren, soinuaren, irudiaren eta beste adierazpenen artean "sinkronia lan bat" egin nahi dutela zehaztu du Zeberiok, testuaren gainean lan egitera mugatu gabe.
Protagonistaren "kontzientzia anatomikoa" izango da antzezlanaren ardatzetako bat, eta gai hori bera eta dramaturgia proposamenaren izaera "berritzailea" nabarmendu dute epaimahaikideek. Agurtzane Intxaurragak, Iratxe Retolazak eta Jaime Valverdek bete dute lan hori.
Sari banaketa datorren ostegunean, hilaren 19an izango da, Andoaingo Martin Ugalde kultur parkean (Gipuzkoa).
