Euskadiko Orkestraren abonu denboraldia 2023ko irailaren 29an hasiko da Gasteizen, eta 2024ko ekainaren 7an bukatuko da Donostian emango duen kontzertuarekin. Orotara, hamabi programa eskainiko ditu orkestrak ohiko dituen lau plazetan, Bilbon, Donostian, Gasteizen eta Iruñean. Guztira, 50 emanaldik osatuko dute EOren abonu denboraldia. Oriol Roch Euskadiko Orkestrako zuzendari nagusiak eta Robert Treviño zuzendari titularrak gaur goizean eman dituzte datorren denboraldiko zertzelada nagusiak, orkestraren Donostiako egoitzan.
Orkestrako arduradunek azaldu dutenez, 2023-2024ko denboraldian, artearen bidez, «sortzen eta eraldatzen duen gizakiarengan» jarri nahi dute arreta. «Pertsona aktiboa eta arduratsua jarriko dugu erdigunean, bere bizi esperientzien —nola espiritualen hala mundukoien— bidez mundua mugitzen duen pertsona, hain justu. Helburu horrekin, besteak beste, Gustav Mahlerren Hirugarren sinfonia, Anton Brucknerren Zazpigarren sinfonia, Henri Dutilleuxen Correspondances, Richard Straussen Aus Italien eta Symphonia Domestica, Sergei Raxmaninofen Hirugarren sinfonia eta Pianorako bigarren kontzertua eta Sergei Prokofieven Alexander Nevski interpretatuko ditu orkestrak. Era berean, Rudi Stephanen Die ersten Menshen opera ere interpretatuko du Euskadiko Orkestrak Bilbon, Arriaga antzokiarekin lankidetzan eta Calixto Bieitoren zuzendaritza eszenikoarekin.
Euskal sorkuntzak ere garrantzi berezia izango du hurrengo denboraldian. Eduardo Txillidaren jaiotzaren mendeurrena beteko denez 2024an, orkestrak obra bat enkargatu dio Antonio Lauzirikari, eta hori (Chillida-Elogios) abonu denboraldiaren barruan estreinatuko du EOk.
Gainera, Itziar Viloriaren Oihartzun gorriak estreinatuko du orkestrak, eta baita Saskia Venegasen At the Aegean Shores obraren berrikuspena ere. Era barean, Ramon Lazkanoren Mugarri ere joko du orkestrak hurrengo denboraldian.
Bestalde, Gabriel Erkorekaren lanen grabazio bat ere egingo du Euskadiko Orkestrak, Juanjo Menak zuzenduta.
Bira Austrian
Aurten Polonian bira arrakastatsua egin ondoren, Euskadiko Orkestrak nazioarteko beste bira bat egingo du hurrengo denboraldian. 2024ko otsailean lau kontzertu emango ditu Austrian; hiru Salzburgon eta beste bat Linzen.
