'MIKHAIL PLETNEV'
Egitaraua: J. S. Bachen Ondo tenperatutako klabea-ren preludio eta fugak (BWV 874, 861, 884 eta 867), R. Schumannen Kreisleriana eta E. Griegen Pieza lirikoak. Lekua: Donostiako Kursaal auditoriuma. Eguna: azaroaren 7a.
Musikarien familia batean jaio zen Mikhail Pletnev, eta 21 urte besterik ez zituenetan, 1974an, Txaikovski Nazioarteko Lehiaketa irabazi zuenetik irudimen eta sormen musikala garatzen eman du bizitza mundu osoan zehar, bai kontzertista gisa, bai eta zuzendaritza zein konposizio lanetan trebatuta ere. Batuta eskuan, errepertorio errusiarra landu eta grabatu du batez ere; pianoan, garai askotarikoetan idatzitako obra gorenei ekin die. Ostiralean Kursaalean eskaini zuen kontzertuan atzeman ahal izan genuen, hain zuzen, zeinen artikulazio bizi eta delikatuaz hurbiltzen den errepertorio barrokora, zeinen kolore eta dinamika aberatsez jantzi dezakeen erromantizismoa, eta zein sotiltasunez aurkezten dituen Griegen motibo liriko norvegiarrak. Beraz, hasieratik esango dut piano-errezital bikain eta zoragarria marraztu zuela.
Lehen zatian, J. S. Bachen Ondo tenperatutako klabea obra itzeletik lau preludio eta fuga interpretatu zituen, teklatu barrokoari eskatu dakizkiokeen tasun guztiak taularatuz: etengabeko mugimenduan sendo, motiboak beti argi eta, oro har, gai bakoitza ulertzeko aire-tartea uzteko sen ona. Ariketa kontrapuntistiko itzela direla nabaria da eta, horren gainetik, musika pieza ederrak ere badirela baieztatu zigun Pletnevek. Ondoren, izaera arras ezberdina duen Robert Schumannen Kreisleriana etorri zen, erromantizismoaren eta konpositorearen beraren aiurri kontrajarriak azaleratzen dituena. E. T. A. Hoffman idazlearen Johannes Kreisler pertsonaian inspiratuta omen dago, gizaki aldakor eta asoziala, Schumannek soilik lau egunetan musikara itzuli zuena, zortzi mugimenduez osatutako pieza fantasiatsu eta eklektikoan. Ez da batere erraza tekla instrumentuari Pletnevek atera zizkion tonuak hain aise agertzea, motel zein arin, beti moldagarri eta doi. Hori gutxi balitz, bigarren zatian Eduard Griegen Pieza lirikoak bildumatik 15 miniatura zabaldu zituen, natura norvegiarraren aldarteak erakutsiz, elegiaren seriotasun eta hieratismotik tximeletaren hegaldi poetikora, beti musikaren zerbitzura.
