THE LEMONHEADS
'Love Chant'
Diskoetxea: Fire Records.
Ia hogei urte zeramatzan The Lemonheadsek kantu propioz osatutako diskorik kaleratu gabe, eta ezustean harrapatu gaitu Evan Dandoren bandaren itzulerak. Aitortu behar dugu sorpresa ederra izan dela, Love Chant-ek bete-betean eusten baitio taldeak 1987tik 1993ra grabatu zituen lan batzuen izpirituari. Melodia argitsuak (58 Second Song), gitarra zorrotzak —J Mascis-enak Deep End-en— eta Dandoren kantuei askotan zerien malenkonia puntu hori (Be-In) biltzen baitituzte kantuok. Kolaboratzaile ugarik lagunduta (Juliana Hatfield, Adam Green), Dandok eta The Lemonheads eraberrituek erakutsi dute sasoi onean bueltatu direla.
