Tropical fuck storm
'Fairyland Codex'
Fire Records
Etengabeko esperimentazioak, gitarra eta soinu estridenteak, erritmo aldaketak, eskema apurtzaileak... Ez genuen, egia esan, gutxiagorik espero: Tropical Fuck Stormen jarraitzailea denak ondo baitaki zer-nolako zurrunbiloetan murgilduko den. Emakumeen ahotsa (Erika Dunn gitarra jolea eta Fiona Kitschin baxu jolea) inoiz baino gehiago nabari da, eta Gareth Liddiard abeslari eta gitarra jolearen ahotsari sostengu polita egiten diote hainbat kantutan. Bestalde, Nick Caveren jarraitzaileei ere gustatzeko moduko ahotsak daude Stepping on a Rake, Moscovium eta abarretan. Irakandji Syndrome eta Bloodsport bezalako pieza arraroek psikodelian sakontzen dute, baina batez ere Fairyland Codex sarkor eta luzeak, Bye Bye Snake Eyes delikatu eta ederrak eta Moscovium gogorrak ematen diote baliorik handiena artefaktu honi.
